National Lampoon-serían er nú komin verulega til ára sinna en hún var upp á sitt besta þegar Chevy Chase var og hét. Nýjasta myndin í seríunni er svo sannarlega ekki fyrir alla. Hér er kafað eins lágt og mögulegt er (t.d. hundasæði og hægðir) í leit að húmor og ótrúlegt en satt þá fær myndin mann nokkrum sinnum til að brosa. Ég er almennt ekki aðdáandi slíks húmors enda afar ódýr. Það sem Van Wilder hefur þó fram yfir aðrar slíkar myndir er að hún hefur hjarta.

Van Wilder þessi hefur komið sér afar vel fyrir í háskólanum sínum enda búinn að vera þar í ein sjö ár. Einn daginn ákveður svo faðir hans að komið sé nóg og ákveður að hætta að greiða skólagjöldin. Til að leysa þetta vandamál ákveður hinn afar vinsæli Van Wilder, ásamt genginu sínu, að koma á fót partýþjónustu. Hún slær í gegn og er snobbaður blaðamaður skólablaðsins leikinn af hinni bráðmyndarlegu Töru Reid sendur út af örkinni til að skrifa grein um Van. Auðvitað heillar Van hana upp úr skónum fúlum kærastanum til mikillar armæðu.

Van Wilder er leikinn af Ryan Reynolds úr þáttunum "Two Guys and a Girl" og á hann stóran þátt í því að gera myndina að hinni sæmilegustu skemmtun með góðum leik. Í meðförum hans verður Van afar viðkunnanleg persóna (ekkert ólíkur Parker Lewis sem var í sjónvarpinu fyrir mörgum árum) sem manni er barasta nokkuð annt um. Og þótt söguþráðurinn sé þunnur og fyrirsjáanlegur og brandararnir æði misjafnir að gæðum þá nýtur maður myndarinnar til enda vegna þess að hann Van Wilder er svo ágætur. - Hallur Örn Jónsson