|
|
Tomb Raider er ein
af poppkornsmyndum kvikmyndasumarsins árið
2001 bæði hér og í Bandaríkjunum og sem
slík er hún ágætlega unnin. Það væri í
raun hrós að segja að söguþráðurinn væri
þunnur þar sem hann einfaldlega gengur ekki
upp innan þess ramma sem gefinn er í þessari
mynd. Söguþráðurinn er þó sjaldnast
vandamál í myndum sem þessum þar sem hann er
langt frá því að vera aðalatriði. Það
sem skiptir mestu máli er að fjörið sé
mikið, hasarinn sé magnaður og nóg sé um
skotbardaga og sprengingar. Ég verð að
viðurkenna að ég lét ákveðna hluta
söguþráðarins fara á taugarnar á mér en
naut samt sem áður hasaratriðana. Á
einhverjum auglýsingarspjöldum fyrir myndina
mátti sjá spurninguna "Hver er Lara
Croft?" Ég spyr á móti "Hver veit
ekki hver Lara Croft er?" Myndin er byggð
á gríðarlega vinsælum tölvuleikjum um
ævintýrakonuna Löru Croft sem er eins konar
kvenkyns Indiana Jones. Á síðustu árum hafa
verið gerðar nokkrar myndir sem byggja á
tölvuleikjum og hafa þær margar hverjar
farið fyrir ofan garð og neðan hjá
kvikmyndahúsagestum. Tölvuleikirnir um Löru
Croft eru hins vegar mjög vinsælir og því
ljóst að mynd byggð á þeim myndi vekja
nokkra athygli og fá góða aðsókn. Lara
sjálf er gríðarlega brjóstagóð og
myndarleg ung kona og var því ljóst strax í
upphafi að það yrði að vanda val á
leikkonu í það hlutverk. Óhætt er að
fullyrða að það hafi heppnast mjög vel þar
sem Óskarsverðlaunaleikkonan Angelina Jolie
(Gone in Sixty Seconds, Girl, Interrupted)
stendur sig mjög vel í hlutverkinu auk þess
sem hún myndast afar vel. Aðrir leikarar eru
fremur lítt þekktir en þó bregður fyrir
föður Angelinu, Jon Voight (Pearl Harbor), í
hlutverki föður Löru. Einnig mun það
væntanlega gleðja aðdáendur bresku
gamanþáttanna Brittas Empire og Red Dwarf að
hinn eini sanni Chris Barrie fer með hlutverk
þjónsins Hillary. Leikstjórinn Simon West á
að baki myndir á borð við Con Air og The
General´s Daughter sem voru hina ágætustu
spennumyndir. Í þetta sinn lét hann sér þó
ekki nægja að leikstýra þar sem hann kemur
einnig nálægt handritinu. Þrátt fyrir
hjálparhönd leikstjórans verður að segjast
eins og er að sagan er þunn en á móti kemur
að hasaratriðin eru fín, atriðin sem tekin
voru á Íslandi koma skemmtilega út og
Angelina sjálf er einstaklega falleg.
- Guðjón
Helgason
|
|
