Ef þú ert í skapi fyrir lélegt handrit, heimskuleg samtöl og slakan leik þá er um að gera að skella sér á þessa kvikmyndanefnu. Saga Alexandre Dumas um skytturnar þrjár, Porthos, Athos og Aramis ásamt hinum unga D´Artagnan, hefur verið kvikmynduð nokkuð oft og það mikið krukkað í söguþræðinum að maður er ekki alveg viss hvað stemmir við upprunalegu söguna og hvað ekki.

Þar sem það er nokkuð langt um liðið síðan maður las bækur Dumas get ég ekki fullyrt að þessi mynd fylgi þeim vel. Ég gæti þó trúað því að handritshöfundurinn Gene Quintano (Sudden Death, Operation Dumbo Drop og einhverjar Police Academy myndir) hafi farið ögn frjálslega með söguna. Leikstjórinn Peter Hyams (Sudden Death, Timecop, End of Days) er vanur spennumyndum og slagsmálasenum og að þessu sinni hefur hann ákveðið að blanda saman bardagatækni Hong Kong mynda og skylmingum. Hann hefur fengið mann frá Hong Kong að nafni Xin Xin Xiong (Double Team, Simon Sez) til að útfæra þessar senur og tekst það svo sem ágætlega enda bardagasenurnar með því áhugaverðasta sem hægt er að sjá í þessari annars slöku mynd.

Leikarahópurinn er hin ágætasti og má m.a. sjá fína leikara á borð við Catherine Deneuve (Repulsion, Dancer in the Dark) og Stephen Rea (Michael Collins, The Crying Game) standa í mynd eins og illa gerðir hlutir og mátti sjá að þau nánast skömmuðust sín fyrir að taka þátt í þessari mynd. Einnig eru þarna miðlungsleikarar á borð við Menu Suvari (American Pie 1 & 2, American Beauty) og hinn unga og mjög óáhugaverða nýja leikara Justin Chambers (The Wedding Planner).

Það er þó hinn frábæri Tim Roth (Planet of the Apes, Reservoir Dogs, Pulp Fiction) sem gerir sitt besta til að bjarga því sem bjarga verður og skemmtir sér mjög vel í hlutverki hins vonda Febre sem er reyndar gerður það vondur að það nær varla nokkurri átt. Það er ekki hægt að mæla með þessari mynd nema fyrir allara hörðustu skyttuaðdáendur eða þá sem hafa gaman af Hong Kong bardagamyndum sama hversu lélegar þær eru. Það er ótrúlegt í hvers konar myndir reynt er að troða Matrixlegum bardagaatriðum. - Guðjón Helgason