Jólin eru að ganga í garð og Meredith Morton (Sarah Jessica Parker) fer með kærastanum (Dermont Mulroney) heim til foreldra hans til að kynnast tengdafjölskyldunni. Svo vill til að fjölskyldan er afar samheldin og tekur hinni ofurstressuðu Meredith ekki opnum örmum. Hún reynir sitt besta til að falla í kramið en allt virðist ganga á afturfótunum.

Leikstjóri þessarar myndar er Thomas Bezucha, sem hefur aðallega unnið í tískubransanum. Hann hefur aðeins einu sinni áður leikstýrt mynd (Big Eden, 2000), en þá líkt og nú skrifaði hann líka handritið. Það er óhætt að segja að honum hafi sannarlega tekist vel til að þessu sinni. Þrátt fyrir að myndin sé fyrirsjáanleg á köflum þá er hér um að ræða stórgóða skemmtun.

Sarah Jessica Parker sýnir stórleik og sannar enn og aftur að hún er frábær gamanleikkona. Hún hefur oft verið óheppin með kvikmyndahlutverk, en The Family Stone hlýtur að vera ein af betri kvikmyndum hennar til þessa. Flestir aðalleikararnir í myndinni fara raunar einnig á kostum, einkum Diane Keaton, Luke Wilson og Rachel McAdams. Dermont Mulroney (My Best Friend's Wedding, The Wedding Date og Must Love Dogs) er hins vegar ekki að sýna okkur neitt sem við höfum ekki séð áður og virðist hann vera fastur í hlutverki kærastans.

The Family Stone er bráðfyndin en ljúfsár gamanmynd sem gæti í raun gengið vel á hvaða árstíma sem er. - María Margrét Jóhannsdóttir