"Hverjir byrjuðu?" er spurning sem virðist hafa hvíla þungt á hermönnum í stríðinu í Bosníu. Myndin No Man´s Land gerist þegar bardagarnir voru sem mestir og segir frá herdeild Bosníumanna sem er stráfelld á einskismanns landsvæði á vígvellinum þar sem herdeildir Bosníumanna og Serba mætast. Einn hermannanna kemst af og liggur særður í skotgröf mitt á milli herdeildanna. Tveir Serbar eru sendir til að ganga frá síðustu lifandi hermönnum herdeildarinnar ef einhverjir eru. Margt fer öðruvísi en ætlað er og á endanum sitja þrír hermenn eftir. Þeir geta ekki gengið burt því þá verða þeir felldir. Þeir verða því að reyna að koma gæsluliði Sameinuðu þjóðanna á svæðið ef þeir eiga að komast lifandi frá þessu.

Leikstjóri og handritshöfundur myndarinnar, Danis Tanovic, er hér að leikstýra sinni fyrstu stóru mynd og hefur þegar hlotið verðlaun fyrir handritið á kvikmyndahátíðinni í Cannes enda sagan mjög áhugaverð og handritið mjög vel unnið. Myndin var einnig tilnefnd til Gullpálmans og vann auk þess Golden Globe verðlaunin sem besta erlenda myndin og er nú tilnefnd til Óskarsverðlauna í sama flokki. Myndin er mjög áhugaverð, spennandi og jafnvel fyndin þó gamanið sé nokkuð grátt. Hér er sögð saga hræðilegra átaka og við fáum örlitla mynd af því hvernig stríð sem þetta getur eyðilagt samfélög og gert menn að brjáluðum drápsvélum. Fólk sem lifir að mestu saman í sátt og samlyndi getur á tiltölulega stuttum tíma orðið að hatursfullum andstæðingum sem ættu ekkert að vera að hafa fyrir því að kynnast því næst þegar þeir hittist mun annar hvor vera í sigtinu hjá hinum.

Þessi bosníska mynd kemur á óvart og vekur mann til umhugsunar. Leikararnir standa sig allir mjög vel. Það er sérstaklega gaman að horfa á aðalpersónurnar deila um hvort þjóðarbrotið beri ábyrgð á átökunum. Dæmi um grátt gaman myndarinnar var að hvor aðili var talinn ábyrgur réðst á því hvor aðalpersónanna hélt á byssu hverju sinni. - Guðjón Helgason