Myndin um gríska brúðkaupið er stelpumynd um stelpu og er svo sannarlega fyrir stelpur. Myndin gæti jafnvel flokkast sem hin prýðilegasta stefnumótamynd. Myndin segir frá hinni óhamingjusömu Toulu (Nia Vardalos) sem er að nálgast þrítugt og er enn ógift sem er reginhneyksli í grískri fjölskyldu því að konur eiga að mati föður hennar að giftast góðum grískum manni, eignast grísk börn og elda góðan, grískan mat. Toula tekur hins vegar málin í sínar eigin hendur og ákveður að mennta sig. Í framhaldinu kynnist hún svo manni að nafni Ian (John Corbett úr Northern Exposure og Sex in the City) sem er ekki grískur og því fullkomlega óásættanlegur í augum fjölskyldunnar sem er stór og hávær og líkleg til að hræða Ian og fæla hann burt ef hann kynnist henni.

Myndin er framleidd af þeim hjónakornum Tom Hanks og Ritu Wilson en leikstjórinn er Joel Zwick sem hefur getið sér gott orð sem leikstjóri hinna ýmsu vinsælu gamanþátta í Bandaríkjunum og má greina gamanþáttahandbragðið á þessari léttu og þægilegu rómantísku gamanmynd. Handritið er skrifað af aðalleikkonunni sjálfri og er sagan alveg ágæt en mjög kunnugleg. Leikararnir standa sig ágætlega í sínum hlutverkum en frægastir þeirra eru líklegast Corbett ásamt ´NSync gaurnum Joey Fatone sem leikur frænda Toulu og kemur lítið við sögu í myndinni.

Myndin er ekki sérlega eftirminnileg en líður ljúflega í gegn meðan á hana er horft og verður sjaldnast vandræðalega væmin eins og oft vill verða með rómantískar gamanmyndir. Gríski þjóðrembingurinn í myndinni er mjög fyndinn og jaðrar á köflum við að fara út í hið fáránlega.

Stelpumynd sem óhætt er að mæla með fyrir stelpur. - Guðjón Helgason