Alex D. Linz vakti fyrst athygli á sér í Home Alone 3 í samskonar hlutverki (en þó ekki sama hlutverkinu) og gerði Macaulay Culkin frægan. Linz fer hér með tiltilhutverkið í mynd sem fjallar um dreng sem verður nóg boðið af yfirgangi hrekkjusvína og skólastjórans í skóla sínum og ákveður að láta til skarar skríða. Þar sem hann er að flytja úr bænum telur hann sig komast upp með hvað sem er. Margt fer þó öðruvísi en áætlað var.

Hugmyndin er svo sem ekki sérlega galin fyrir leikna Disney barna- og unglingamynd en hún hefur ekki verið útfærð nægilega vel. Aðalhetjan er ekki svöl en vill vera það, vinir hans eru ekki svalir, en hvers virði er að vera svalur ef maður glatar vinum og virðingu. Þetta er það sem er verið að boða og kemst til skila á einstaklega einfeldningslegan hátt.

Leikararnir standa sig allir alveg ágætlega. Linz tekst að halda myndinni sæmilega á floti þrátt fyrir arfaslaka sögu. Af eldri leikurum eru það grínarinn Larry Miller, í hlutverki skólastjórans, og Jamie Kennedy (Scream myndirnar), í hlutverki vonda íssalans, sem eru nokkuð góðir.

Leikstjórinn Tim Hill er svo sem vanur því að leikstýra barna- og unglingamyndum hafandi leikstýrt Muppets From Space. Hann gerir sitt besta með það sem handritshöfundarnir hafa rétt honum.

Þetta er mynd sem fellur ef til vill sæmilega í kramið hjá ungum áhorfendum en það er hætt við að foreldrum og eldri systkinum kunni að leiðast á köflum þegar hefndaraðgerðir aðalsöguhetjunnar fara að virka afar hjákátlegar og yfirdrifnar. - Guðjón Helgason