Just Friends segir frá Chris Brander (Ryan Reynolds) sem lagður var í einelti í framhaldsskóla og var ástfanginn af bestu vinkonu sinni, Jamie (Amy Smart) sem elskaði hann hins vegar eins og bróður. Tíu árum síðar snýr hann aftur í heimabæ sinn yfir jólahátíðina, en þá hefur hann lagt af fjölmörg kíló og er orðinn yfirmaður í Hollywood.

Just Friends er leikstýrt af Roger Kumble sem hefur m.a. gert myndirnar The Sweetest Thing og Cruel Intentions. Söguþráðurinn er kannski ekki sérlega frumlegur en atburðarásin er hreint sprenghlægileg á köflum og persónurnar flestar mjög skemmtilegar, og minnir myndin því að vissu leyti á gamanmyndir Farrelly bræðra.

Ryan Reynolds vakti fyrst athygli í þáttunum Two Guys, a Girl and a Pizza Place, en hefur síðan leikið í nokkrum kvikmyndum, m.a. gamanmyndinni Van Wilder. Hér tekst honum býsna vel upp og greinilegt að hann er upprennandi gamanleikari. Amy Smart stendur sig ágætlega, en Anna Faris fær hins vegar mun skemmtilegra hlutverk, en hún leikur klikkuðu poppstjörnuna Samönthu James.

Just Friends bráðskemmtileg og ærslafull gamanmynd sem ætti að koma öllum í gott skap. - María Margrét Jóhannsdóttir