“Joy Ride” er ein af þessum myndum sem láta lítið yfir sér en koma skemmtilega á óvart. Hér er um hágæða hrylli-trylli að ræða með John Dahl við stjórvölinn en hann hefur m.a. gert hinar ágætu “Red Rock West” og “The Last Seduction”. Hér segir frá þremur ungmennum sem kalla yfir sig yfirgengilega reiði vörubílsstjóra vegna talstöðvargríns sem tvö þeirra gera að honum. Prakkararnir eru tveir bræður, annar prúður háskólanemi leikinn af Paul Walker (The Fast and the Furious) en hinn en óstýrilátur vandræðagemlingur sem komist hefur í kast við lögin. Sá er leikinn af Steve Zahn sem einnig má sjá í “Evil Woman”. Þeir eru á leið að sækja vinkonu þess fyrrnefnda (Leelee Sobieski) þegar þeir fremja hrekkinn. Hann fellur vægast sagt ekki í góðan jarðveg og við tekur æsilegur eltingaleikur þar sem sögusviðið eru sveitavegir hins strjábýla suðvesturhluta Bandaríkjanna.

John Dal leikur sér hér að myndavélinni á frábæran hátt og notar alls kyns stílbrögð til að auka á spennu og óróleika áhorfenda. Hann kann að nota sér veðrið, viðbrögð leikaranna, dimm og drungaleg mótel, tónlistina og jafnvel litlu hlutina eins og fjarlægðina milli persónanna til að vekja viðbrögð. Margt í myndinni gæti verið tekið beint upp úr handbók sjálfs meistara Hitchcock. Handritið sem, fyrir þá sem hafa áhuga, er að hluta til skrifað af J.J.Abrams, upphafsmanni sjónvarpsþáttaraðarinnar “Felicity”, er hreint ágætt. Við og við reynir þó alvarlega á trúverðugleika þess en þó næst meginmarkmiðið vel sem er að skapa spennu. Persónurnar hafa þó nokkra dýpt, sérstaklega vandræðabróðirinn sem er bæði óþolandi og áhugaverður. Steve Zahn skemmir ekki með góðum leik, sömuleiðis er Sobieski ágæt. Paul Walker er hér aftur við stýrið og sýnir í þetta skipti betri leik en í “The Fast and the Furious”. Hér er um fyrirtaksmynd að ræða sem uppfyllir öll skilyrði svona mynda og vel það. - Hallur Örn Jónsson