Joe Dirt er sveitalubbi af bestu gerð. Hann hlustar á rokk og ról, ekur um á druslu og er algerlega grunlaus um allt. Joe Dirt er svokallaður “redneck”, eða það sem við Íslendingar höfum kallað “Sigurjón digra” í gegnum tíðina. Sigurjón þessi varð viðskila við foreldra sína í fjölskyldufríi þeirra til Miklagljúfurs þegar hann var 9 ára og hefur það ætíð verið þrá hans að finna foreldra sína. Áhorfendum gefst einstakt tækifæri til að upplifa gleði og sorgir Sigurjóns við þessa ævintýrafullu leit hans, áhorfandandum langoftast til mikillar kátínu. David Spade, einn fremsti sjónvarps- og bíómyndagrínari BNA stendur sig vel í hlutverki Sigurjóns digra og kætir áhorfandann eftir bestu getu. Handritið er ágætt, en Spade hefur einnig hönd í bagga þar ásamt David Wolf. Lítið er hægt að segja um þessa mynd annað en að þetta er fín gamanmynd með ágætisbröndurum, en sjaldan skellir maður uppúr. Myndin er hugljúf undir lokin og bjargar það endinum. Ekki besta gamanmynd sem þú munt sjá, en er alls ekki svo slæm. Sigurjón digri er maður sem þú vilt kynnast, eða er hann kannski búinn að tjalda við hliðiná þér? - Eggert Páll Ólason