Tom Wilkinson (The Full Monty), Sissy Spacek (Coal Miner´s Daughter, Carrie) og Marisa Tomei (My Cousin Vinny) eru öll tilnefnd til Óskarsverðlauna fyrir leik sinn í þessari mynd og eru öll vel komin að þeim tilnefningum enda standa þau sig frábærlega í sínum hlutverkum. Wilkinson og Spacek leika hjónin Matt og Ruth en sonur þeirra Frank á í ástarsambandi við Natalie (Tomei) sem er fráskilin tveggja barna móðir sem er auk þess eldri en hann. Fyrrverandi eiginmaður hennar er ofbeldisfullur og á erfitt með að sætta sig við að hjónabandinu sé lokið. Einn örlagaríkan dag gengur hann frá Frank og hafa þeir atburðir alvarlegar afleiðingar.

Hér er um að ræða átakanlega og áhrifaríka sögu og er reynt að sýna fram á þá þjáningu og erfiðleika sem foreldrar Frank ganga í gengum. Reiðin nær tökum á þeim og þau þurfa að læra að tjá tilfinningar sínar.

Leikarinn Todd Field er hér að leikstýra sinni fyrstu kvikmynd í fullri lengd en hann hefur gert ótal stuttmyndir og leikstýrt sjónvarpsþáttum. Hér hefur Field tekist að gera fremur áhugaverða mynd úr efni sem fyrirfram hefði vel átt heima í dramatískri sjónvarpsmynd á sunnudagskvöldi. Sagan er einföld og Field hefur safnað saman mjög hæfileikaríkum hópi leikara og fengið það besta út úr hverjum og einum þeirra og því verður mjög áhugavert að fylgjast með ferli Field á næstu árum.

Það sem mætti einna helst finna að myndinni er hversu hæg hún er og sagan þolir einfaldlega ekki 130 mínútur. Ekki besta mynd síðasta árs í Bandaríkjunum en það er auðvelt að sjá hvers vegna margir vilja meina það og tilnefna hana í þeim flokki til Óskarsverðlauna. - Guðjón Helgason