Teiknimyndir þær sem ég hef séð á síðustu 12 mánuðum hafa flestar verið mjög skemmtilegar. Ice Age er engin undantekning. Myndin gerist, eins og nafnið bendir til, á ísöld. Þrjú ólík dýr lenda í hremmingum við að reyna að koma ungabarni aftur til föður síns. Letidýrið Sid (John Leguizamo), loðfíllinn Mannfreð (Ray Romano úr Everybody Loves Raymond) og tígrisdýrið Diego (Denis Leary) lenda fyrir röð tilviljana í mikilli ævintýraferð. Þessi misleiti hópur er mjög skemmtilegur og ævintýri þeirra á köflum afar kostuleg.

Myndin er sýnd bæði með ensku og íslensku tali svo myndin fari ekki fyrir ofan garð og neðan hjá yngstu áhorfendum. Ég sá myndina með ensku tali en efast ekki um að talsetningin sé vel unnin að vanda. Ég man þó að þegar ég var yngri, sem er ekki svo langt síðan nota bene, var ekki eins mikið um talsett barnaefni og barnamyndir eins og í dag og það hefur bara haft góð áhrif á enskukunnáttu mína.

Kvikmyndafyrirtækinu Fox hefur tekist að búa til fyndna og hjartahlýja tölvuteiknaða mynd fyrir alla fjölskylduna. Tæknilega er myndin mjög vel unnin og það er hreint frábært að sjá hvernig teiknimyndir hafa þróast með tilkomu tölvunnar á síðustu áratugum. Líklega hef ég þó sagt það áður, t.d. um Monsters Inc., en góð vísa er aldrei of oft kveðin.

Dódófuglinn fær það óþvegið í þessari mynd og koma þeir fuglar skemmtilega inn í myndina. Heimskari dýrategund hefur ekki sést á hvíta tjaldinu síðan Pókemon fyrirbærin fóru að tröllríða öllu og ég kaus að hunsa þær merku kvikmyndir. Heimskari mun þó Hómer Simpson líklega vera ef eitthvað verður úr kvikmynd um Simpson fjölskylduna sem hefur verið lofað á allra næstu áratugum. Það er hins vegar íkorninn með hnetuna sem stelur myndinni. Það er frábært að fylgjast með honum rembast eins og margrædd rjúpa við að grafa hnetuna sína í ísnum.

Fyndin og skemmtileg fjölskylduskemmtun sem ætti ekki að svíkja neinn. - Guðjón Helgason