Ég hef ekki séð söngleikinn um Hedwig sem hefur verið nokkurs konar "költ-hit" hin síðari ár þannig að ég vissi ekki alveg hverju ég ætti við að búast þegar ég sá myndina. Eftir að ég hafði séð hana vissi ég þó að ég hefði frekar viljað sjá söngleikinn. Hedwig þessi er misheppnaður kynskiptingur frá gömlu Austur-Berlín sem er endurskýrð í höfuðið á móður sinni. Eftir fall múrsins flýr hún hið þrúgandi líf í Austur-Evrópu til Bandaríkjanna í von um frægð og frama á tónlistarsviðinu. En lífið þar er ekki glans á rósum og þarf hún að takast á við hin ýmsu vonbrigði. Hinn tiltölulega óþekkti John Cameron Mitchell skrifar handritið og leikur aðalhlutverk myndarinnar. Það seinna ferst honum ágætlega úr hendi þó stundum eigi hann til að ofleika. Handritið er hins vegar einfaldlega fremur óspennandi. Þetta er óheillandi saga sem er alltaf við og við trufluð með háværum skrautsýningum í formi laga sem eiga að útskýra hugarástand Hedwig. Tónlistin var ágæt en það vantaði samt að straumurinn færi um mann eins og vill gerast þegar svona verk eru sett á svið. Því mæli ég frekar með að fólk athugi söngleikinn áður en leiðin er lögð í bíó. - Hallur Örn Jónsson