Hinar föstudagsmyndirnar hans Ice Cube, þ.e. Friday og Next Friday, hljóta að hafa farið mjög vel í kvikmyndahúsagesti fyrst hann hefur ákveðið að gera eina til viðbótar. Hann hefur meira að segja fengið þá snilldarhugmynd að láta hana gerast um jólin. Ekki veit ég hverslags gríngimsteinar hinar myndirnar hafa verið en þessi er nett kartafla í skóinn svona rétt fyrir jólin.

Ísmolinn sjálfur og frændi hans Day Day (Mike Epps) leigja saman hjá gribbu sem vill fá leiguna borgaða. Þeir lenda í því að maður klæddur sem jólasveinn stelur jólagjöfunum þeirra og leigupeningunum á þorláksmessukvöld. Þeir eru því í vondum málum því gribban hótar að siga vöðvastæltum syni sínum á þá og leyfa honum að riðlast hressilega á þeim ef þeir ekki borga leiguna á aðfangadagskvöld. Sonurinn er víst nýkominn úr fangelsi eftir 12 ára dvöl í þröngum vistaverum með karlmönnum. Því næst mæta þeir í vinnu sem öryggisverðir í vafasamri verslunarmiðstöð og svo rekur hver vitleysisleg senan aðra í einn og hálfan tíma.

Fyrsta föstudagsmyndin gekk nokkuð vel í fólk árið 1995 en þá lék ísmolinn á móti hinum skemmtilega Chris Tucker (Rush Hour 1 og 2). Í Next Friday og þessari nýjustu afurð hefur hann hins vegar þurft að sætta sig við hinn gríðarlega húmorshefta Mike Epps. Það virðist reyndar sem Cube og Epps séu að mynda einhverskonar teymi í kvikmyndum þar sem þeir hafa utan föstudagsmyndanna reynt við spennugrín með myndinni All About the Benjamins.

Ég held að hægt sé að draga þetta saman þannig að leikurinn er forkastanlegur, og handritið ber þess augljós merki að hafa verið samið í hraði til þess eins að hægt yrði að henda myndinni í sýningar um jólin. Svo á án efa að reyna að láta hana lifa næstu árin sem blökkumanna-jóla-grínmyndina hjá jólamyndaþyrstum almenningi.

Ég leyfi mér að efast um að fyrri myndinar séu jafn slakar og þessar en ef svo er þá er löngu kominn tími á að taka þessa seríu úr sambandi. - Guðjón Helgason