Gamanmyndin Evil Woman, eða Saving Silverman eins og hún hét í Bandaríkjunum, er nýjasta verk leikstjórans Dennis Dugan (Happy Gilmore, Beverly Hills Ninja, Big Daddy). Myndin fjallar um æskuvinina Wayne (Steve Zahn), J.D. (Jack Black) og Darren (Jason Biggs). Á fullorðinsárum virðast þeir ekki hafa náð ákveðnum þroska og eru enn að láta eins og unglingar. Þeir spila saman í hljómsveit sem flytur lög eftir Neil Diamond enda eru þeir miklir aðdáendur hans. Þegar hinn rómantíski Darren Silverman hittir sálfræðinginn Judith Fessbeggler (Amanda Peet) riðlast vinátta strákanna því hún stjórnar Darren og meinar honum að hitta vini sína. Það er þá sem Wayne og J.D. fara af stað með áætlun um að bjarga vini sínum Silverman úr klóm þessa kvendjöfuls. Þessi mynd er að mörgu leyti svipuð myndum Farrelly bræðra en það sem þeim tókst að gera snilldarlega á köflum heppnast ekki nægilega vel í þessu tilfelli. Sagan er of furðuleg og það virðist hafa verið reynt of mikið að fylla myndina af steiktum aðstæðum og furðulegum persónum án þess að það gangi fyllilega upp. Það er varla hægt að hafa samúð með nokkurri persónu í þessari mynd og hægt fullyrða að þessi mynd sýni í senn kvenfyrirlitningu og hatur á karlmönnum. Persónurnar eru annað hvort fullkomlega vondar eða fullkomlega aulalegar og tillitslausar. Myndin er á köflum fremur smekklaus þó það sé í sjálfu sér ekki alltaf slæmt því smekkleysi getur virkað mjög vel í myndum þó svo hafi ekki verið í þetta sinn. En þrátt fyrir alla þessa galla verður að segjast að á köflum var hún nokkuð fyndin en ég verð þó að mótmæla því að áhorfendur hafi þurft að sjá rassstækkunaraðgerð óklippta í kvikmynd. - Guðjón Helgason