Norska myndin Elling fjallar um þá félaga Elling og Kjell Bjarne sem kynnast á hæli. Elling hafði alist upp innilokaður hjá móður sinni og við dauða hennar er honum um megn að takast einn á við lífið. Á hælinu kynnist hann Kjell Bjarne og með þeim herbergisfélögunum tekst góður vinskapur. Þeir eru síðan sendir saman aftur út í hinn harða heim og flytjast til Osló þar sem þeir búa saman í íbúð og reyna að aðlagast samfélaginu. Elling reynist erfitt að gera einföldustu hluti eins og að svara í símann eða fara út í búð en saman reyna þeir félagar að takast á við lífið.

Leikstjóranum Petter Næss hefur tekist að gera mjög hlýja en um leið fyndna mynd um tvo menn sem eru á skjön við venjulegt þjóðfélag og þurfa að taka á öllu sínu við að framkvæma hluti sem eru sára einfaldir fyrir þá sem teljast venjulegir eða eðlilegir. Per Christian Ellefsen (Elling) og Sven Nordin (Kjell Bjarne) standa sig frábærlega í aðalhlutverkunum. Elling, aðdáandi Gro Harlem Brundtland númer eitt, er nákvæmi gaurinn sem talar vandað mál og þarf að hafa allt nákvæmlega eins og hann vill hafa það á meðan Kjell Bjarne er þögla, sterka týpan sem þó á það til að fá bræðisköst.

Myndin er sérlega vel gerð og tilnefnd til óskarsverðlauna nú í ár sem besta erlenda myndin og er vel að þeirri tilnefningu komin. Myndin líður ljúflega í gegn og fær mann til að skella upp úr og vekur mann um leið til örlítillar umhugsunar. Mannleg mynd um einstaklinga sem eru aðeins öðruvísi en við hin. - Guðjón Helgason