Ef hinn alræmdi leikstjóri Ed Wood, sem Johnny Depp gerði ódauðlegan í samnefndri mynd, risi upp frá dauðum er ekki ólíklegt að Double Take yrði hans fyrsta mynd í Hollywood dagsins í dag. Myndin fjallar um starfsmann hjá banka, Daryl, sem kemst að því að eitthvað dularfullt er á seyði varðandi einn viðskiptavin bankans og lendir hann í miklum hremmingum í framhaldi af því. Honum til halds og trausts er svikahrappurinn Freddy og hundurinn hans. Þessi mynd er endurgerð myndarinnar Across the Bridge frá árinu 1957 en án efa er búið að breyta ýmsu í þessari útgáfu. Leikararnir Orlando Jones og Eddie Griffin hafa væntanlega valið þessa mynd til að vekja athygli á sér og koma sér áfram í Hollywood og verð ég því að álykta að þeir hafi virkilega talið þetta góða mynd. Svo er ekki, myndin er einfaldlega það vond að merkilegt er að hún hafi yfir höfuð verið gerð. Leikurinn er fremur slakur, jafnvel mjög slakur, og sorglegt að horfa upp ágætan leikara eins og Edward Herrmann standa þarna eins og illa gerðan hlut og fara með þessar gölluðu línur. Handritið er afar slakt svo vægt sé til orða tekið og þegar óvæntar fléttur eru farnar að kalla fram hlátur hjá áhorfendum þá er ekki von á góðu. Í stuttu máli sagt væri Ed Wood væntanlega stoltur af þessari mynd - en það er ekki gott. - GH