Það færist heldur betur fjör í tilfinningalíf hinna írsku Owen systra, og reyndar bróðurins líka, þegar draumaprinsinn verður á vegi þeirrar yngstu en heillar raunar alla fjölskylduna. Þegar ég segi draumaprinsinn, þá meina ég draumaprins allra kvenna. Maður sem virðist hafa þann meðfædda hæfileika að geta uppfyllt óskir og draumóra hverrar og einnar konu, hversu mismunandi sem þeir eru. Adam er þó alls ekki einhver tilfinningalaus kvennabósi heldur gerir hann "fórnarlömbunum" meira gott heldur en vont, gæðir þau raunar nýju lífi. Svona persónur eru náttúrulega frekar ótrúverðugar og margt sem gerist í myndinni fellur ekki síður í þann flokk. Samt sem áður er hérna um ósköp "sæta" litla mynd að ræða en einmitt það lýsingarorð lýsir myndinni best. Maður þarf að kafa djúpt eftir einhverju innihaldi, hún er ekki eins fyndin og mér fannst að hún ætti að vera en engu að síður er hún afskaplega sæt. Hún er skemmtilega skrifuð og leikaraliðið skilar sínum hlutverkum vel. Sérstaklega á Stuart Townsend (Shooting Fish), sem leikur Adam, hrós skilið fyrir að gera afskaplega ótrúverðuga og raunar algjörlega innihaldslausa persónu bara þó nokkuð skemmtilega. Frances O'Connor og stærsta stjarna myndarinnar, Kate Hudson (Almost Famous), standa sig líka vel verkum þrátt fyrir að írski hreimurinn vefjist á köflum nokkuð fyrir þeim. "About Adam" er afskaplega sæt mynd og hin ágætasta dægrastytting en þó lítið meira. - Hallur Örn Jónsson