Wanted er óvæntur smellur í sumarflórunni, frábær hasarmynd frá leikstjóranum Timur Bekmambetov, sem fæddist í Kasakstan, og er kunnastur fyrir vinsælar vampírmyndir sem hafa verið sýndar hér á landi. Sagan segir frá ungum manni, sem leiðist óstjórnlega í vinnunni og lætur alla vaða yfir sig, en dregst inn í heim alþjóðlegra leigumorðingja þegar hann kemst að því að faðir hans var einn sá færasti í faginu og hann er sá eini sem getur hefnt hans.

Angelina Jolie er klárlega stjarna myndarinnar og á stóran þátt í vinsældum hennar - og er í algjöru toppformi að þessu sinni. James McAvoy (Atonement) nær að koma sínu hlutverki vel til skila, sem aðalsöguhetjan, og Morgan Freeman er góður að vanda.

Myndin er byggð á teiknimyndasögum og eru hasaratriðin því vel stílfærð eins og búast má við og húmorinn beittur, svo úr verður vönduð ævintýra- og hasarmynd.

María Margrét Jóhannsdóttir