Guði sé lof fyrir Græna ljósið. Það virðist ekkert lát á fyrsta flokks myndum á þeim bænum. Sú nýjasta, The Darjeeling Limited, er jafnframt nýjasta mynd Wes Andersons sem hefur á undanförnum árum fært bíógestum úrvalsmyndir á borð við The Royal Tenenbaums. Hann hefur þó náð nýjum hæðum með The Darjeeling Limited, sem fangar athygli áhorfenda strax á fyrstu mínútu með frábærri stuttmynd, Hotel Chevalier, með Jason Schwartzman og Natalie Portman. Schwartzman leikur einn af Whitman bræðrunum, en í upphafi myndarinnar hittast þeir í Darjeeling lestinni á Indlandi eftir andlát föður þeirra, til að reyna að styrkja bræðraböndin.

Það hefur oft verið sagt að myndir séu veisla fyrir augu og eyru, og það hefur sjaldan eða aldrei átt jafn vel við og í þessari mynd. Tónlistin er frábær og litagleðin allsráðandi, leikstjórnin og kvikmyndatakan mögnuð. Handritið kemur úr smiðju Andersons og Schwartzmans, sem skrifa það ásamt Roman Coppola, sem er eins og nafnið gefur til kynna sonur Frances Ford Coppola og bróðir Sofiu. Það eru þó leikararnir sem setja punktinn yfir i-ið í myndinni, Schwartzman, Adrien Brody og Owen Wilson, sem sýnir hófstilltan en frábæran gamanleik. Bill Murray spillir ekki heldur fyrir með nærveru sinni.

The Darjeeling Limited er sannkölluð ævintýraferð sem flytur þig langt úr bíósalnum og inn í hugarheim Andersons og hálfa leið til Indlands.

María Margrét Jóhannsdóttir