In Bruges
		Myndin fjallar um tvo launmorðingja sem hafa nýlokið verkefni sem fór hryllilega úrskeiðis. Án sýnilegrar ástæðu sendir yfirmaður þeirra þá til Brugge í Belgíu, en sá staður státar víst af heillegustu miðaldarásýnd í Evrópu. Þeir Ray (Farrell) og Ken (Gleeson) eru mishrifnir af Brugge, en Ray vill drekka og elta stelpur á meðan Ken nýtur menningarinnar. Síðar kemur á daginn að ferðin var engin tilviljun, því annar þeirra á að fá að njóta sín þar áður en honum er hegnt fyrir hryllilegan verknað sem hann framdi í síðasta verkefni. Samspil þeirra Ray og Kens er uppspretta margra ágætra brandara, enda eru þeir töluverðar andstæður þrátt fyrir að tilheyra starfstétt launmorðingja. Og til að bæta í gamanið fáum við að kynnast rasískum dverg og öðrum kómískum karakterum. Grínið í myndinni er ágætt, en nær aldrei tökum á manni enda þarf maður að þola býsna ógeðfelld atriði inn á milli. Myndin virðist á köflum ansi stefnulaus og jafnvel langdregin þrátt fyrir að vera einungis rúmar 100 mínútur. Hún er engu að síður ágæt skemmtun, fyndin og spennandi á köflum. Sævar Guðmundsson

Til baka á forsíðu Kvikmyndir.com