|
Hver er uppáhaldsmynd
Andreu Róbertsdóttur?
Ég er í
klípu! Það er nú alveg vonlaust fyrir mig
að velja uppáhaldsbíómyndina mína. Allt
þetta uppáhalds-eitthvað fer nú bara eftir
stund og stað en ég skal gera mitt besta. Ég
var oft í pössun hjá ömmu minni þegar ég
var lítil og ótrúlegt en satt átti hún
frábært vídeóspólusafn. Ég var því bara
í góðum gír og horfði aftur og aftur á
Sound of Music og ABBA The Movie. ABBA sigraði
heiminn eftir að hafa unnið Júró árið
1974. Í myndinni er fylgst með goðunum á
tónleikaferðalagi og einhverjum blaðamanni
sem var alveg sveittur við það að reyna að
ná viðtali við goðin. Búningarnir og
sviðsframkoman tær snilld og þetta ólst ég
upp við… guð minn góður! Og svo kom
gelgjan og mikið af henni. Myndir eins og
Sixteen Candles, Pretty Woman og Coming to
America eru í miklu uppáhaldi hjá okkur
stelpunum enda "meistarastykki". Við
erum enn með frasana á hreinu og
saumaklúbburinn heitir meira að segja Randy
Whatson eftir einni persónu úr Coming to
America. Og talandi um frasa, hvar hefði ég
verið án kvikmyndarinnar Með allt á hreinu?
Hana kunna nú allir jafn vel og stunurnar í
When Harry Met Sally.
Sumar
kvikmyndir eru bíómyndir og aðrar
vídeómyndir. Sumar verður maður að sjá í
bíói, eins og t.d. Moulin Rouge. Frábærir
leikarar, tónlist, búningar, klipping og
tökur. Ég var alveg eftir mig þegar myndinni
lauk. Fór nefnilega á forsýninguna og vissi
ekkert um myndina. Það er nú líka annað,
mér finnst frekar dapurt að hafa lesið
einhverja dóma um mynd áður en ég sé hana
í bíói. Þessar stjörnur flækjast bara
fyrir mér.
Önnur
eftirminnileg bíóferð var þegar ég sá Life
Is Beautiful. Þetta er frábær mynd sem spilar
á allan tilfinningaskalann. Ég sat í sætinu
mínu og skellihló og grenjaði til skiptis.
Ótrúlega fín mynd.
Forrest Gump,
LA Confidential, Last Tango in Paris, Lion King,
Dirty Dancing, Godfather myndirnar, Pulp
Fiction, Leyndarmál og lygar, Fargo og Festen
eru myndir sem ég held t.d. mikið upp á. Ég
skelli þeim stundum í tækið og virðist
aldrei fá nóg.
Eitt er á
hreinu, það er alveg sama hversu myndin er
skemmtileg eða skelfileg … poppið er alltaf
ómissandi í bíóinu og ógeðslega gott!
Ps. Brad Pitt
er ógeðslega flottur í Fight Club -
úllalla!!!
Andrea
Róbertsdóttir
|
